CollageMaker_20190109_031717751

今日有報道指有人見到陳家樂同陳瀅喺一月三日現身東京機場,齊齊等上機返香港。抵達香港港國際機場後,戴冷帽及黑色口罩嘅陳家樂先出閘,之後佢去下巴士站扮等巴士,然後又去返機鐵站買飛搭車,期間全程警覺性極高,好似驚俾人發現咁。之後,佢發現有傳媒跟蹤後,就改咗搭的士走。據講佢哋今次係四日三夜嘅東京甜蜜遊,一齊除夕倒數,sweet住迎接19年。

▲ ELLE.com.hk

29歲嘅「宅男女神」陳瀅(Jeannie),係無綫近年力捧上位小花,因外貌甜美加上演技不俗,深得網民愛戴。除咗有觀眾緣之外,佢嘅桃花亦非常旺盛,16年與賭王兒子何猷亨分手後,佢嘅桃花越嚟越旺。過往都有唔少藝人同陳瀅傳出過緋聞,今日就同大家數一數陳瀅嘅緋聞男友啦!

陳家樂

最新鮮滾熱辣嘅有陳家樂,有傳佢哋因合作拍攝《廉政行動2019》而日久生情,今日有報道指有讀者喺大前晚(1日)見到陳瀅同陳家樂喺日本餐廳撐枱腳。佢哋全程有講有笑,陳家樂個樣仲好似好冧咁。食完飯佢哋前後腳離開餐廳,之後陳瀅仲揸車載陳家樂返自己香閨。

羅天宇

羅天宇同湯洛雯喺今年3月分手,有傳羅天宇喺分手後火速搭上陳瀅,早前仲話佢哋已經秘戀半年。有報道指佢哋為咗掩飾關係,所以搵埋另一對緋聞情侶劉佩玥同周志文一齊去睇戲,不過一向小心謹慎嘅陳瀅就提早半個鐘離場走人。

余德丞

今年8月頭,陳瀅約埋一班朋友出海開船P,陳瀅喺IG Story上載咗兩段片,片中余德丞兩度大叫「我愛陳瀅!我愛陳瀅!」,疑似高調示愛,陳瀅聽到心都甜埋。

何猷亨

 陳瀅雖然同賭王兒子何猷亨拍拖半年後分手,但佢哋仍有聯絡,有報道指佢哋翻撻兼頻頻約會,仲試過被影到佢哋一齊行街、食飯、睇煙花,兼到四太梁安琪旗下樓盤看樓。

方力申

方力申與拍拖10年鄧麗欣(stephy)喺前年分手後,緋聞不斷。喺上年4月,有報導指佢已經秘撻陳瀅三個月,仲喺蘭桂坊嘅酒吧密會。

張振朗

查看相片

當時陳瀅啱啱甩拖,佢同張振朗就喺劇集《全職沒女》中飾演兩夫婦,更傳佢哋因為一場吻戲而擦出愛火,更試過被傳媒影到佢哋喺將軍澳一齊食早餐。

溫家偉

查看相片

喺15年8月,有報道指陳瀅睇中大隻仔溫家偉,仲同吳若希爭,所以主動去溫家偉嘅雪糕店歎雪糕,期間佢哋旁若無人,黐到實係咁自拍。

周志文

「巨聲幫」周志文(大孖)有指因屢勸不改四圍媾女,喺15年被無綫提前解約,陳瀅亦喺大孖嘅追女名單上。

林景程

喺14年拍攝劇集《四個女仔三個 Bar》期間,有指林景程暗撻陳瀅,拍攝期間更主動做阿四,一時擔遮,一時遞水,服侍周到。喺劇集大結局當晚,成班演員出席完活動後,佢哋就去咗九龍城食糖水,仲當街調情。